raptures of folly ~ blogitus ergo sum

Der Tag derna

valgKlick fer en gressri Wersio vaner Tabälla, Kwälla: Wikipedia

Ja äbu, geschter hensch gwählt und ds Resultat isch gar nid eso schlimm üsacho, wienich zersch gmeint hä: D’Enhedslisten het iru Sitza gibhaltut, d’Venstre vam altu und nöi Präsi het sche verloru, aber es längt ne glich ohni Ny Alliance fer d Mehrheit… allerdings mit genau 90 fra 179 Mandat und dasch eso knapp wie nummu megli und der Grund warum ich mit dem güet cha läbu: D Regierig *müess* nämli mit de Linggu zämuschaffu, willsch sälber z’wenig sind, fer sicheri Abschtimmige z’hä. Dasch doch emal en güeti Nachricht! :)
Meh güets git’s fer d SF (Socialistisk Folkeparti) – di hent bi dische Wahle so vill Sitza gigwunnu wie suschter no nid. Da gratulieri doch va Härzu. Wer irum Präsi, dum Villy Søvndal (ja, der heisst wirkli Schlaftal :) ), schomal züeglosut het, weiss warum. Der het gitscheggt, wie wichtig Charisma isch… und dass öi ohni Angschtmacheri geit. Güet gmacht, Kamerad! :D
Zum Schluss wellti grad no d NZZ va hittu korrigieru: Der Anders Fogh schaffut sehr wahrschinli NID mit der Ny Alliance zämu – öi we das im Vorderhand es hechers Meh gäbi. Der Naser Khader isch im appa eifach z’grossus Risiko, dum chlinu Anders-Sicherheitsfanatiker (mu chenti besch si und mu Hossuschisserli sägu, aber dass truwti mi nid öffentlich). Wie ds dänisch Fernseh hittu morgu vor de sägschä seit, will der Anders zwar mim Naser verhandlu, aber ob der im wirkli Verhandlingsmacht git oder mu nummu es entwäder/oder abietut, isch fraglich dücht mich. Will eso richtig iner Regierig wellunsch d Ny Alliance appa nid wägs der Dansk Folkepari: Das gäbi nämli wahrschinli es rächts Pulverfass mit dem und der Pia Kjærsgaard zämu… das gsehwer ja iner Schwiiz reglmässig mit dum Blocher wa gägs di Calmy-Rey schiessut. Schtellet che jetz vor, we di Calmy-Rey würdi zrug schiessu. Huiuiui, dassi weri es Fäscht!

neineinei!!!

Warum losst mier de niemu? Mu chenti fasch meinu, dass hie niemu Wallisertitsch verschteit! Hmmm, wie ds dänisch Fernseh sit eru Schtund seid, gseht üs wie der Anders Fogh blibt und di bedu chlinschtu Partiä (Enhedslisten und Kristlendemokraterne) kei Sitz verchämunt. Warum sind d Lit eso bekwem und hent Angscht vor Veränderige?

Meh Nöis gits schpeter… hoffuntli bessri.

Wahltag in Dänemark

Ich weiss nid, wefill das mu bi ew dadruber gkhert het, aber hina isch uf all Fäll Wahltag hie obina und es isch scho es bitzji gschpässig, wemu nid darf ga wählu… ds Parlamänt hie obina bitrifft mich ja vill meh wäder der Blocher und Co und überhöipt hanich ja sowiso en Meinig zu allum. Was dischi Wahle bitrifft, so binich (appa z’ersch mal in minum Läbu) eso lings igschtellt wie’s gradeso geit! Das het aber nix dermit z’tüe, dassi hie Üsländeri bi, sondern mit der Mitti-rächts-konservativ-liberalu Regierig va de letschtu sägsch Jahr. Der Präsi (Anders Fogh Rasmussen) weri mer ja eiguntli no gli, aber das är bisher mit der rächtserwäderrächtu DF (Dansk Folkeparti) zämugschafft het, fer ds absolut Mehr iner Regiärig (Folketing) z’hä, macht mer nu mega unsympatisch! Wie chamu nummu! Das isch ungfähr eso, wie we d’CVP mit der SVP würdi zämuschliessu – Skandal! :)
Helle vs AndersAber zrug inu Nordu: Mier imponierunt hie im grossu und ganzu d’linggu Partiä mit ihru Präsi-kandidatin Helle Thorning-Schmidt, meh, will di wellunt zämu en Wäg finnu und der soll nimme Blok-Politik (also, Mehrheit gägs Opposizio), sondern breiti Zämuarbeit quer uber d’Mitti heissu. Das finn ich tehnt güet. Ufer rächtu Sitta, gseht’s nämli meh derna üs, dass du bisherig Regierig umschichschlat und iru einzig Argumänt “wier brüchä meh Zit” isch. Das finnich es bitzji dünn. Ich finnu d’Linggu – sogar d’üsserscht Linggu (Enhedslisten) – am realistischu… wemu mal derfa abgseht, dass d’Enhedslisten vill ds Eigutum a Produktionsmittl abschaffu. ;) Aber im grossu und ganzu hent di gitscheggt, dass wemu epis will, dass öi epis choschtut und das Theme wie Asylantu, Arbeitsmärt, Klima und öffuntliche Sektor fer d’Wähler vill relevanter isch wäder Angschtmacheri mit Terror und Öiguwischeri mit Schtiirsenkige.
En letschte Kommentar willi grad no der Ny Alliance widmu – dasch nämli en soz’sägu niglnaglnöii Parti was ersch sit es paar Monät git. Iri Posizio isch der Momänt no es bitzji schwer abz’schätzu, will schi zum Bischpil ufer eintu Sita du Ander Fogh zu ihrum Präsidentschaftskandidat ernännunt, aber ufer andru Sita va im wellunt das är na der Wahl en “Dronningerunde” üsriäft. Das biditut, dass d’Schefu va jeder Parti na de Wahlä zer Königin sellunt und ira sägunt, wer ds Königlich Unersüecher soll wärdu, wa di Bildig vaner Regierig unersüechut. Eso en Königinsrundi isch nid Pflicht, aber normalerwiis chunt’s eso üsa, dass der Königlich Unersüecher öi Schtaatsminischter/Präsidänt wird und das weri ja es Risiko fer du momentanu Präsidänt, eso en Rundi izleitu, falls inu di bisherigu Unerschtützer anzmalsch nimme wählti. Mit andru Wort: D’Ny Alliance will wärunt dum Wahlkampf di bisherig Regierig unerschtützu, fer d’Schtimme va ihru Wähler z’vercho und na der Wahl, wägslutsch de villi d’Meinig und geit zu de Linggu… dasch uf all Fäll wie’s der Momänt üsgseht.

Anders Fogh Rasmussen oder Helle Thorning-Schmidt isch hina m’abu also d’Frag… und ich hoffu nid, dass ds Froweli nummu di bessra va zwei gringe Alternativä isch, sondern z’Verschprächu vam Dialog kwer uber d’Mitti haltut. Noch Fragen Kienzle?

suuuuuuuultæææææææææææn!

It’s 1pm and I’m way to hungry to care: Somebody please come and kick my collegue who’s supposed to go and get our lunch! There’s a bounty of

  • 1 leverpostejmad or
  • 1 agurkmad or
  • 1 franskbrødmad med tunsalat

  • for the first one to go and punch her — go boys!

    Verbi

    Üs “gegebenem Anlass” es paar Erinnrige ani Joy Denalane und du Max Herre… wie die Ziit vergeit… und alles andra schiinbar öi.

    Esperanto

    Mit dir

    Sag’s mir

    1ste Liebe

    Change

    FK 10

    Sind das jetz wirkli meh wäder zäh Jahr? – Nej, nid ganz, will Esperanto ja nid wirkli der Afang isch gsi. Hanich jetz wirkli d’länginä uberleit, welli Video alles am beschtu zämufassunt? – Ubbbs.

    Will they ever learn?

    First this and now that… I’m so ashamed, I could cry.

    PS: Yes Thomas – I wrote this in English… everybody should know how bad it is “down there”.

    Alles nöi macht der… Oktobär!

    Hejejej, hanich wirkli scho so lang nix meh gschribu? Es isch wirkli aner Zit, dass ich emal wider epis schribu, will z’verzellu git’s eiguntli e schuppu. Zum Bischpil, dass ich sit emu Monat en nöie Tschob ha, dass wier es Auto gchöift hei und das sowiso und uberhöipt nix meh eso isch wie’s emal isch gsi. :) Aber der Reia na:

    Ich ha ja d’Schutza Arbejt gsüechut und da wani im Summer gschaffut ha, het’s mer ja uberhöipt nid gfallu. Derna hani zersch gmeint, ich verchäme en Tschob als Ubersetzeri, wasch mer soz’sägu im Vorabu wider abgseit hent. De siwer es paar Täg im Wallis gsi (fer iischers Tamtam tamtam la z’sägnu) und derna hani wider vollrohr Biwärbige gschribu. De het’s de anzmalsch öi Vorschtelligsgschpräch grägnut ud bis z’letscht hani mer sogar chennu üssüechu, wani will ga schaffu! – Ja eso cha’s ga! :) Ich ha uf all Fäll fer dischi munzigchli Firma entschidu, wa rächt sälbschtändig isch, obwohlsch emu grossu Konzern agschlossni sind. Der Höiptgrund isch der güet und sympatisch Idruck vaner Schefi und d’abwäxligsriich Arbeit gsi (ich machu so zimli alles, vaner Rächnig bis zer Büdschekontroll und füfhuner Sache zwischuntri) und bisnuch hani’s öi nid biröit. Es löift allz wie gschmirt und ich mi mier sälbsch mal wider z’grescht Problem (müess ubedingt leru, mini Erwartige an mich sälber uf es realistischus Niwo embricha z’schrübu und meh Gidult z’ha!).

    Wägs minum Tschob (und will wer jetz Klötz hei), heiwer jetz äbu öi es Auto gchöift! Mine Arbeitswäg isch zwar nummu ca. 20km, aber mit Bussa miessti zweimal wäxlu und weri mind. en Schtund unerwäx. Im Februar zigglut d’Firma zwar mitsch ind Schadt, aber wier hei isch scho so an iischers Brumbrum gigwent, dass wer’s grad fasch sicher nid verchöife. :)
    Es isch de nu fellig eso en Sach, schich fer schiis ERSCHTUSCH Auto z’entscheidu! Wier hei d’Länginä umcha glüegut und gläsu und gfahru ud iisch schlussändli fer en naglnöie silbergrauä Mitsubishi Colt, 1.5, Insport entschidu. En Occassio lohnt schich hie nid deschwärt, willsch durch du ganz Rägu meischtenz in nid so güetä Züeschtänd sind und d’Versichrig en halbe Bärg choschtut (vor allum, will wier no nie es Auto hei kha). Bi Mitsubishi heiwer aber es megagüet’s Agibot vercho, wawer grad fasch nid hei chenu nei sägu. :) Iisch passt iischers Autili eifach. Chennet ja bim Ma ga lüegu, wie’s üsgseht.

    Und jetz müessi wirkli no es paar Brötli verdienu – susch gitz de nix z’mittag!

    Matthäus zum Letschtu

    Judihui und fallera, hitta isch mine letschtusch Tag ja ja! Ich glöibi, eso richtig hani’s no gar nid gitscheggt, aber ab hina m’abu, halbi Füfi binich wider en friiä Mänsch! Jodeliho! (Ich cha zwar eiguntli nid jodlu, aber ich bi so froh, dass grad fasch alls chenti va barer Freid!)

    Miis Gjäis hett jetz de hoffuntli öi es änd… dasch aber no nid sicher… finnu mer de sicher wider epis nöis zum druber schgattu. :) Aber jetz hani uf alli Fäll de afa mal Wuchuänd und Mentag, Zischtag fri. Wie’s nachher genau witer geit, weissi zwar no nid, aber wenn ich eso anu Züeschtand va iischer Wohnig deichu, tengi’s dera güet, wenni no es paar Täg meh der Zit hetti zum Üfrümu!

    Es geit ubrigens nummu no zwei Wuchä und sägsch Täg, bis wier (also ich, mini Ma (!) und d Schwigreri) fer es paar wenigi Täg deheimu geh ga Sunna und Wermi tanku – va bederlei het’s dische “Summer” hie obina nämli nid deschwärt vill gigä. Im Gäguteil, aber es git hie sogar es Liedji wasch druber singunt wie flott der dänisch Summer isch, wa d Litt immer wider enttüschut. Aber das het mit Klimaverändrig appa nix z tüe – z Gidichtji isch nämli va 1923!

    Und jetz isch Zit fer Zmittag – en Güetä!

    gäääääääääääääääääääääääääääääääähn

    gaehn.jpgIch glöibu hittu isch der längscht Tag va der Wält… aber das hani eiguntli öi scho geschter gseit. Und wahrschinli letschti Wucha öi. Und d Wucha derfor sowiso. D’Erklerig fer mis Miser isch nid appa z’wenig Schlaf (amal nid nummu), sondern wahrschinli längwilligscht Schtell wani je ha ka. – Dasch eifach keis Gält wärt, dass mu jede Morgu vor aller Zif üfschteit, fer derna der ganz Tag im Büro nummu uf d Ühr z’lüegu! Also Ehruwort! Zum Glick isch das jetz mini letscht Wucha bi der Firma Nixztüe und Zvillgält GmbH (würdi nie wagu du Namu z’nännu, will Mit Aeresch RickSch Kei schritt… und ich will ja nid di si, wane seit, wie chrottotummi schi sind).

    Wenn der Schtüel bekwem gnüeg und ds Büro es bitzji riewigär weri, nämi prompt no en Nock… ihhhh, das we’s jetz. Aber nei, ich müess gli no zwei Schtunne üsharru. Puh, zwei mal sächzg Minütä! Das chunt mer der Momät no ewigs vor! Aber ich cha mi ja afa mal in Gidanku uf hina m’abu vorbireitu – da häni nämli es Vorschtelligsgschpräch fer en nöii Schtell – wani zwar weniger Gäld verdienu, aber hoffuntli epis gschiders z’tüe ha, wäder nix. Nimmt mi afa Wunner wie das üsa chunt… gringer wäder hie cha’s ja fasch nid si! Hie passt mer nämli nix – wäder d Lit, no d (inexischtänt) Arbeit, no der Arbeitswäg… da, chunt mer grad zit: Ds Ässu geit no eso und am Mittwochnamittag gitz immer Chüechu, dasch öi nid eso schlächt. Aber susch – gfrewu mi scho uf Fritagemabu, halbi Füfi: Nix wie weg hier!

    Und jetz heri üf jäisu… amal fer jetzu. :)

    Dasch der Grööl!

    Hittu scho glacht? – Falls nid oder gäru nomal: 1…2…3…CLIIIIIIIIIICK!

    Jede Kommentar weri zwei zvill.

    « Previous Entries

     
    4:21 pm