Hmmm – jetz isch doch wirkli währli war scho Septämber! Sienta mal hani z Gfühl mier seckle di Zit derfa. Ich liggu de emabu im Bett und schtudieru, wasi eiguntli du ganz Tag gmacht ha… Wutsch, und scho wider isch en Tag verbi. Dische geit küm me anerthalb Schtund. Zit gnüeg emal wider epis “gschids” z verzellu.
Also: Disch Wucha isch hie z Århus Fäschtwucha (Festuge), das isch eso en Art Vifra oder OGA wa en aber nid nummu ineru Halla oder imu Zält isch, sondern chritz und quer uber di ganz Schtadt verteilt und es git öi kei Schtänd wasch einum gottscheswas Plunder wellunt adreiu, sondern kulturelli Sache wie Theater und Tanz. Es isch also eiguntli ganz annersch – nummu d’Fäschteri isch di glicha. Di ganz Schtadt ischa also im kulturellu “High”-Züeschtand: An jedum Egg isch eswells wa singut, tanzut oder suschter eswie du Göiggle macht – und ich gniessu umcha z löifu und eifach nummu de Lit züe z lüegu. Geschter hani zum Bischpil en Gruppa jungi Iru (also va Irland – nid vaner Psüchjatri) gseh tanzu – di sind de apa genial gsi! Di Bei sind da grad eso umcha gfloggu und di hent d Oberkörpera gli bockschtilli kä – Wau!
Annoscht heiwer es Tanztheater gseh, wa sägsch jungi Pirschtlini eso mit Brejckdänz und Akrobatik en ganzi Gschicht verzellt hent (Ja genau – das sind di uf dum Bildji) – wier si me so schpontan grad dra gluffu, aber hei’s sicher nid biröit – Wenn me Tiinis tanzti schtatt anand prigglu, wissti ich ja nimme uber wa mini Liz z schribu! Moru m’Abu gani de grad wider… und am Samschtag öi… und negscht Wucha gewer ins Theater ga züelüegu, wie andri tanzunt… Wenn da mine Meischter nid bald inschpiriert wird, bini de mit minum Latin – äh, mit minum Dänisch am Änd.

Allora. Ich ha mer nomal uberleit, warum ich mier eiguntli dische Blog igrichtut hä – fer ds verzellu, wie’s eso isch, mis Läbu imu andru Land. Wenni aber lüegu, va wasi bis jetz eso gschribu ha, het das alles eiguntli nix dermit z tüe, in wellum Land dassi jetz wohnu – nummu mit Zigglu und Irichtu und deschi Zigs und we apa fasch in jedum Land ähnlich. Der Grund isch apa, das mich hie obina nimme so wirkli vill uberrascht und ich mich scho lang and’meischtu kulturellu Unnerschida gigwänt ha.
Das soll schich jetz aber ändru: Ich ha geschter du Blog vom Jens-Rainer Wiese entdeckt. Är wohnut scho es paar Jahr inner Schwiz, aber merkt no jetz jede Tag, was bi isch eso alles annersch isch wäder z’Titschland. Schine Blog isch so zum Schiessu – fer Titschi, Schwizer und alli andru, wa schich fer serigs interessierunt! – dass ich mier jetz vorgno ha, alle Quatsch wa mer gschpässig vorchunt, hi üfschribu, dassi de schpeter nomal sche z’lachu hä.

D’meischtu hent appa nid wirkli verschtannu, wassi meinu mit dem Titl nydanskere – indvandrer – udlændinge. Das isch natirli Dänisch und biditut im Prinzip drimal z’glicha: Lit wa hie wohnunt, aber va eswa annersch chämunt – wienich, chentimu jetz deichu, aber dasch nid ganz richtig. Will mim erschtu Wort meint mu eper wa schich zimli güet integriert het, d’Schprach redut, hie schaffut und Schtire zahlt, aber nid mimu dänischu Pass giboru isch. Mu cha das Wort positiv oder negativ üsleggu – entwäder dass di Dänu härzig sind und es eigunts Wort fer das hent oder de, dass schich wirkli integrieru sehr schwer isch und dü eifach nie wie schi bisch. Hmmm. Ich nimmu da natirli der halbvoll Bächer. Mit dum negschtu Wort binich nid gmeint, will schi das eiguntli nummu fer Flüchtlinga brüchunt. Äs isch aber nid wirkli schlächt gmeint, aber ich weri ja eiguntli öi en Inwandreri. Hmmm, gewer witer zum letschtu Wort. Dasch der wanu am meischtu khert (öi im Radio/Fernseh). Das isch wol der Bigriff wa äntli mal ALLI ipackt und öi wenn das no so wahr isch, so bini gli froh, das’ fasch nieme passiert, dass eper merkt, dass ich nid va hie bi. Ich glöibu es git wirkli absolut gar nix, wa mich eso ufi Palma bringt, wie wenn eper versüecht ultranätt z si und darum afat jeder Wort GANZ GANZ ditlich z’sägu und bi der zig mal naz’fregu, obi verschtege, was är meine. GRRRRRRH – nummu dra z’deichu macht mi aggressiv. Jaja, schi wellunt nummu nät si. Aber kei dänische Pass z’hä isch kei Chrankheit und öi kei Biwis derfir, dass mu es döfi isch… iiiih, dass hetti denu Lit düe mal sellu sägu… in fehlerfriium Dänisch natirli.

Hie hani nu grad zwei Site gfunnu, wa der Unnerschid zeigunt: Dischi Sita fer Neudänu gitz nummu uf Dänisch… Dischi Sita fer Iwandrer het zwar öi nummu Dänischi Artikla, het aber scho uf er erschtu Sita en Link uf Englisch, wasch sägunt, das mu bi ine öi uf Englisch Hilf verschunt.

Bi grad schwer ufum Gsundheitstrip: Ich ha Ärpär im Layout, bi ufer Süech nachumu nöiiu Welo und jetz hani öi no en Epfl vorer Nasa. Ich weiss, ich weiss. Ich bi no nie en grosse Macfän gsi, aber irgendeswie hani mi gli derzüe la uberschnurru und weisch was: Ich glöibu nid, dassi di entscheidig biröiu: Das Chaschtji cha doch grad fasch alles und es brücht grad fascht gar kei Platz (wa wier in iischer Miniwohnig eh nid hetti). Alles in allum also en geniali Sach – und wier si öi demunah zfridni. Chenet che ja afa per Mail amäldu fer Besichtigungstermina.

… das bi mier wiähächtlich rot-griä-wiss isch? – Wennd aber genauer lüegusch, het’s da wäder Chrischtbeim no Adväntschränz. Di chennunt no sägsch Monat wartu. Zersch chunt der Summer und wie heiss, dass der hie obina cha si, erläbi der Momänt grad der ganz Zit. *Schwiiiiiiiiiiiiiiiiiiitz* Zer Abchielig ässi am Löifmeter Ärpär und darum hani gideicht, ich chenti das in minum Blog verewigu. Und? Hesch scho gluscht uf es paar vercho? Nimmt mi Wunner, wie lang das geit, bis mi en Ärpär-Liferant schponsrut? – Bi da aber fer Agibot offu!

Tja äbu, zig Lit hent mich scho agfregut, was de mit der Galleri lossi und ehrli gseit, isch mer das lang öi nid eso klar gsi…

Mine Tätschmeischter (nid das är mich apa schla tengi oder so! Und miär Meischter ischär ja eiguntli öi nid, aber äbu… weisch scho wasi meinu ) het schich der Sach emal agnu und ohni jetz lang ufi Details (wani sälber nid eso ganz duchxeh) izga, chani jetz lüt und schtolz verchintu, dass di Galleri wider löift – und das’s nöii Foto het… zum Bischpil das hiä rächts.
Vill Vergniegu!

… ich ga jetz moru wirkli uf London bis am Mentag… wenn eswas isch, schribet mer es Mail oder säget’s der besser Hälfti… der selti nämli brav deheimu si und fer schini Prüfig am Fritag leeru… oder eso

Bis am Zischtag… heit’s flott!

Ha nummu grad churtz wellu mitteilu, dass d’Foto vaner Hochzit vaner Barbara und dum Enzo jetz online sind und ier di alli chenet ga alüegu. Zwei Sache gitz daderzüe no z’sägu:

Äs sind vill z’vill Foto fer dass ich di alli iner Top Üflesig hetti ins Netz gladu (gengi vill z’lang), wenn also eswells wellti es paar Foto nahmachu, schicket mer doch es Mail (raptures@folly.dk) mit de Titla va de Foto. Ich schicku chu de di besser Üflesig.

Ich la d’Foto da jetz nid bis SanktNimmerlein la schta. Grad pressieru miessedär wägs deschi nid, aber ich nimmu scha de eifach eswe wider wäg. Düe aber de vorher nu gad sägu.

Vill Vergniägu

- chenet uf dischi Nachricht oder im Album kommentieru… wiä der wellet.