Archive for the '*Schüderhaft äresch' Category

Da verchusch ja es chriesi!

Chunt mer grad fasch eso vor, als tiängi dischu Blog nummu nu zum Video sammlu brüchu… ähm, ja, was hani jetz eiguntli wellu… ah ja – es Video zeigu. :D
Ganz nahm Motto: Wenn’s suschtär scho nix z’lachu git!

Ha de no miessu uberleggu, obi das soll uner “schüderhaft äresch” oder “appa nummu gugus” tüe… und mi de fer ds erschta entschidu. Will öi wenn z Filmji luschtig isch, isch d’Situazio doch z’äresch fer nummu lächerlich z’si. Gschider nid z’vill druber naschtudieru und froh si, dass mu schini Chölä nu het… so lang mu scha nu het…

Jetz isch fertig!

SehtestWirklich, wärli, wahr – jetz isch fertig, schluss und amen! Sit Donnschtag scho und sowiso und überhöipt… ich la das nimme züe, ich tüe mier das nimme a, ich va mis Läbu numal a. Niemmu sellti schich das miessu atüe. Ds Läbu isch eifach z’churz fer serigä… und jetz sägis titsch und tidlich: SCHEISS! Tschau Abhängigkejt und Süecheri, Chopfweh und Schträbilook. Jetz isch Zit zum Welofahru im Rägu, Wasserballonschlachtä und Schwimmu im Meer. Va jetz awäg löift nix me a und isch nix me uscharf… im Gäguteil: Ich gsehsus jetz ganz klar – ohni Brille, ohni Linse, ohni gar nix!

Ah ja… Lasik tüet wäder we, no het’s mi epis gchoschtut… 3mal Hurra fer di dänisch Chrankukass (und d’horrändu Schtiirä)!

Was weri we?

Hittu hani im Büro es Lied gkhert, wani sofort gideicht ha, dassi’s öi mit nid-dänisch-redundä wellti teilu und wani bi heimcho hani gmerkt, dass no meh Grind git: Ds Lied hensch nämli gschribu, fer alle biwusst ds machu, dass vor 18 Jahr en Konvenzio uber d’Rächt va Chind vaner UNO isch agnomni cho… und dass di Rächt no lang nid uberall ufer Wält gältunt. Das mu grad vor Wiähnächtu emal wider da dra deichut, macht doch Si – öi we d Melodi schtreckuwiis gränzwärtig kitschig isch, aber ds Wiähnächtu vermerktu mu das va barum Oh du Fröhliche und Last Christmas ja küm. Ah und übrigens chunt d’Unicef hittu 61-jährigi – de chamu di öi wirkli mal “mental” mit emu Blogartikl unerschtützu. :)

Und jetz zum Lied – es heisst “hvad nu hvis”, was wörtlich eiguntli “was jetz we” biditut, aber ich finu “was weri we” besser. Es sigunt der Alex (uber inu hani eswiä nix chenu üsafinu) und Nik&Jay – wa uf dischum Blog ja soz’sägu scho alti Bikannti sind. Aber lotzet sälber… und wer Luscht het, cha ja derna no läsu, wasch eiguntli sigunt (di paar Linie Tegscht im Video sind übrigens vadär Chinderkonvenzio – artikl 28, 38, 31, 12, 34, 29, 9 und 2):

#KLIK HIE FER ZUM VIDEO Z CHO#

(Alex) Weri ich es Sägelschiff ufum offnu Meer,
de weri schi där Himml wa mich heimbringti.
Weri ich es Chorufäld,
de weri schi där Summerrägu wamu druf wartut.
Und weri ich en Grossschtadt,
de weri schi d’Energi wa mier Läbu und Liecht gäbi.
Und weri ich nomal sibni,
de weri schi där Schnee wa vorum Feischter falti.

Schi biditut mier alz,
la das nie la verbiga.
Schi isch mis eis und alz,
ich will nid eleinzig schta.

Was weri also, we es tagsch alli Schtärna wäg weri,
und was weri we’s kei Wind me gäbi.
Und ds Sunna nieme wellti ds Gsicht zeigu.
Was bliibt de no z’machu?
Und was we der Schnee awäg schmälzti,
und was we’s nimme chämi ga rägnu.
Was weri we alz schwarz chämi.
Ich hoffu, dass das nie passiert – ich brüchu dich hie.

ohoh, oh oh oh oh oh oh. ohoh, oh oh oh oh oh oh.

Was we ich en Pfifoltra weri,
de weri schi d’Sunnuschtrahlä wa mini Fligl wärmti.
We ich mich im Wald verirrti,
de weri schi d’Schtärna hoch obina, wa mier zeigti wanich minä Wäg findti.

Schi biditut mier alz,
la das nie la verbiga.
Schi isch mis eis und alz,
ich will nid eleinzig schta.

Was weri also, we es tagsch alli Schtärna wäg weri,
und was weri we’s kei Wind me gäbi.
Und ds Sunna nieme wellti ds Gsicht zeigu.
Was bliibt de no z’machu?
Und was we der Schnee awäg schmälzti,
und was we’s nimme chämi ga rägnu.
Was weri we alz schwarz chämi.
Ich hoffu, dass das nie passiert – ich brüchu dich hie.

(Jay) Das isch mis Läbu, ich gniessu d’Schou. Ich weiss, dass das oberflächlich tehnt,
aber es git Sache wanich will machu bifor dass mini Zit abgluffu isch.
Das sind di Sache wanich weiss, dasch epis biditunt.
Ey Schtärna iner Färni, zeigät mier du Wäg, ich chumu ew gäru na.
Wier hei das gmacht, wier si hie. Was isch nid umbringt, macht iisch schtercher. Nik –
(Nik) ja. Lami es bitzji la kämpfu, es bitzji la gäru gä.
Ich bi hie ja nummu fer en Öigublik.
Bivor Ebbe und Flüet alz äwäg wäschunt, will ich fer mich und mini schribu,
und ich versüechu fer dich und dini z’schribu,
will es git niemu, wa’s verdient het eleinzig z’läbu.

(Alex) Was weri also, we es tagsch alli Schtärna wäg weri,
und was weri we’s kei Wind me gäbi.
Und ds Sunna nieme wellti ds Gsicht zeigu.
Was bliibt de no z’machu?
Und was we der Schnee awäg schmälzti,
und was we’s nimme chämi ga rägnu.
Was weri we alz schwarz chämi.
Ich hoffu, dass das nie passiert – ich brüchu dich hie.

ohoh, oh oh oh oh oh oh. ohoh, oh oh oh oh oh oh.
ohoh, oh oh oh oh oh oh. ohoh, oh oh oh oh oh oh.

(oder so ähnli)

Frohi Adväntszit allä zämu!

Der Tag derna

valgKlick fer en gressri Wersio vaner Tabälla, Kwälla: Wikipedia

Ja äbu, geschter hensch gwählt und ds Resultat isch gar nid eso schlimm üsacho, wienich zersch gmeint hä: D’Enhedslisten het iru Sitza gibhaltut, d’Venstre vam altu und nöi Präsi het sche verloru, aber es längt ne glich ohni Ny Alliance fer d Mehrheit… allerdings mit genau 90 fra 179 Mandat und dasch eso knapp wie nummu megli und der Grund warum ich mit dem güet cha läbu: D Regierig *müess* nämli mit de Linggu zämuschaffu, willsch sälber z’wenig sind, fer sicheri Abschtimmige z’hä. Dasch doch emal en güeti Nachricht! :)
Meh güets git’s fer d SF (Socialistisk Folkeparti) – di hent bi dische Wahle so vill Sitza gigwunnu wie suschter no nid. Da gratulieri doch va Härzu. Wer irum Präsi, dum Villy Søvndal (ja, der heisst wirkli Schlaftal :) ), schomal züeglosut het, weiss warum. Der het gitscheggt, wie wichtig Charisma isch… und dass öi ohni Angschtmacheri geit. Güet gmacht, Kamerad! :D
Zum Schluss wellti grad no d NZZ va hittu korrigieru: Der Anders Fogh schaffut sehr wahrschinli NID mit der Ny Alliance zämu – öi we das im Vorderhand es hechers Meh gäbi. Der Naser Khader isch im appa eifach z’grossus Risiko, dum chlinu Anders-Sicherheitsfanatiker (mu chenti besch si und mu Hossuschisserli sägu, aber dass truwti mi nid öffentlich). Wie ds dänisch Fernseh hittu morgu vor de sägschä seit, will der Anders zwar mim Naser verhandlu, aber ob der im wirkli Verhandlingsmacht git oder mu nummu es entwäder/oder abietut, isch fraglich dücht mich. Will eso richtig iner Regierig wellunsch d Ny Alliance appa nid wägs der Dansk Folkepari: Das gäbi nämli wahrschinli es rächts Pulverfass mit dem und der Pia Kjærsgaard zämu… das gsehwer ja iner Schwiiz reglmässig mit dum Blocher wa gägs di Calmy-Rey schiessut. Schtellet che jetz vor, we di Calmy-Rey würdi zrug schiessu. Huiuiui, dassi weri es Fäscht!

neineinei!!!

Warum losst mier de niemu? Mu chenti fasch meinu, dass hie niemu Wallisertitsch verschteit! Hmmm, wie ds dänisch Fernseh sit eru Schtund seid, gseht üs wie der Anders Fogh blibt und di bedu chlinschtu Partiä (Enhedslisten und Kristlendemokraterne) kei Sitz verchämunt. Warum sind d Lit eso bekwem und hent Angscht vor Veränderige?

Meh Nöis gits schpeter… hoffuntli bessri.

Wahltag in Dänemark

Ich weiss nid, wefill das mu bi ew dadruber gkhert het, aber hina isch uf all Fäll Wahltag hie obina und es isch scho es bitzji gschpässig, wemu nid darf ga wählu… ds Parlamänt hie obina bitrifft mich ja vill meh wäder der Blocher und Co und überhöipt hanich ja sowiso en Meinig zu allum. Was dischi Wahle bitrifft, so binich (appa z’ersch mal in minum Läbu) eso lings igschtellt wie’s gradeso geit! Das het aber nix dermit z’tüe, dassi hie Üsländeri bi, sondern mit der Mitti-rächts-konservativ-liberalu Regierig va de letschtu sägsch Jahr. Der Präsi (Anders Fogh Rasmussen) weri mer ja eiguntli no gli, aber das är bisher mit der rächtserwäderrächtu DF (Dansk Folkeparti) zämugschafft het, fer ds absolut Mehr iner Regiärig (Folketing) z’hä, macht mer nu mega unsympatisch! Wie chamu nummu! Das isch ungfähr eso, wie we d’CVP mit der SVP würdi zämuschliessu – Skandal! :)
Helle vs AndersAber zrug inu Nordu: Mier imponierunt hie im grossu und ganzu d’linggu Partiä mit ihru Präsi-kandidatin Helle Thorning-Schmidt, meh, will di wellunt zämu en Wäg finnu und der soll nimme Blok-Politik (also, Mehrheit gägs Opposizio), sondern breiti Zämuarbeit quer uber d’Mitti heissu. Das finn ich tehnt güet. Ufer rächtu Sitta, gseht’s nämli meh derna üs, dass du bisherig Regierig umschichschlat und iru einzig Argumänt “wier brüchä meh Zit” isch. Das finnich es bitzji dünn. Ich finnu d’Linggu – sogar d’üsserscht Linggu (Enhedslisten) – am realistischu… wemu mal derfa abgseht, dass d’Enhedslisten vill ds Eigutum a Produktionsmittl abschaffu. ;) Aber im grossu und ganzu hent di gitscheggt, dass wemu epis will, dass öi epis choschtut und das Theme wie Asylantu, Arbeitsmärt, Klima und öffuntliche Sektor fer d’Wähler vill relevanter isch wäder Angschtmacheri mit Terror und Öiguwischeri mit Schtiirsenkige.
En letschte Kommentar willi grad no der Ny Alliance widmu – dasch nämli en soz’sägu niglnaglnöii Parti was ersch sit es paar Monät git. Iri Posizio isch der Momänt no es bitzji schwer abz’schätzu, will schi zum Bischpil ufer eintu Sita du Ander Fogh zu ihrum Präsidentschaftskandidat ernännunt, aber ufer andru Sita va im wellunt das är na der Wahl en “Dronningerunde” üsriäft. Das biditut, dass d’Schefu va jeder Parti na de Wahlä zer Königin sellunt und ira sägunt, wer ds Königlich Unersüecher soll wärdu, wa di Bildig vaner Regierig unersüechut. Eso en Königinsrundi isch nid Pflicht, aber normalerwiis chunt’s eso üsa, dass der Königlich Unersüecher öi Schtaatsminischter/Präsidänt wird und das weri ja es Risiko fer du momentanu Präsidänt, eso en Rundi izleitu, falls inu di bisherigu Unerschtützer anzmalsch nimme wählti. Mit andru Wort: D’Ny Alliance will wärunt dum Wahlkampf di bisherig Regierig unerschtützu, fer d’Schtimme va ihru Wähler z’vercho und na der Wahl, wägslutsch de villi d’Meinig und geit zu de Linggu… dasch uf all Fäll wie’s der Momänt üsgseht.

Anders Fogh Rasmussen oder Helle Thorning-Schmidt isch hina m’abu also d’Frag… und ich hoffu nid, dass ds Froweli nummu di bessra va zwei gringe Alternativä isch, sondern z’Verschprächu vam Dialog kwer uber d’Mitti haltut. Noch Fragen Kienzle?

Alles nöi macht der… Oktobär!

Hejejej, hanich wirkli scho so lang nix meh gschribu? Es isch wirkli aner Zit, dass ich emal wider epis schribu, will z’verzellu git’s eiguntli e schuppu. Zum Bischpil, dass ich sit emu Monat en nöie Tschob ha, dass wier es Auto gchöift hei und das sowiso und uberhöipt nix meh eso isch wie’s emal isch gsi. :) Aber der Reia na:

Ich ha ja d’Schutza Arbejt gsüechut und da wani im Summer gschaffut ha, het’s mer ja uberhöipt nid gfallu. Derna hani zersch gmeint, ich verchäme en Tschob als Ubersetzeri, wasch mer soz’sägu im Vorabu wider abgseit hent. De siwer es paar Täg im Wallis gsi (fer iischers Tamtam tamtam la z’sägnu) und derna hani wider vollrohr Biwärbige gschribu. De het’s de anzmalsch öi Vorschtelligsgschpräch grägnut ud bis z’letscht hani mer sogar chennu üssüechu, wani will ga schaffu! – Ja eso cha’s ga! :) Ich ha uf all Fäll fer dischi munzigchli Firma entschidu, wa rächt sälbschtändig isch, obwohlsch emu grossu Konzern agschlossni sind. Der Höiptgrund isch der güet und sympatisch Idruck vaner Schefi und d’abwäxligsriich Arbeit gsi (ich machu so zimli alles, vaner Rächnig bis zer Büdschekontroll und füfhuner Sache zwischuntri) und bisnuch hani’s öi nid biröit. Es löift allz wie gschmirt und ich mi mier sälbsch mal wider z’grescht Problem (müess ubedingt leru, mini Erwartige an mich sälber uf es realistischus Niwo embricha z’schrübu und meh Gidult z’ha!).

Wägs minum Tschob (und will wer jetz Klötz hei), heiwer jetz äbu öi es Auto gchöift! Mine Arbeitswäg isch zwar nummu ca. 20km, aber mit Bussa miessti zweimal wäxlu und weri mind. en Schtund unerwäx. Im Februar zigglut d’Firma zwar mitsch ind Schadt, aber wier hei isch scho so an iischers Brumbrum gigwent, dass wer’s grad fasch sicher nid verchöife. :)
Es isch de nu fellig eso en Sach, schich fer schiis ERSCHTUSCH Auto z’entscheidu! Wier hei d’Länginä umcha glüegut und gläsu und gfahru ud iisch schlussändli fer en naglnöie silbergrauä Mitsubishi Colt, 1.5, Insport entschidu. En Occassio lohnt schich hie nid deschwärt, willsch durch du ganz Rägu meischtenz in nid so güetä Züeschtänd sind und d’Versichrig en halbe Bärg choschtut (vor allum, will wier no nie es Auto hei kha). Bi Mitsubishi heiwer aber es megagüet’s Agibot vercho, wawer grad fasch nid hei chenu nei sägu. :) Iisch passt iischers Autili eifach. Chennet ja bim Ma ga lüegu, wie’s üsgseht.

Und jetz müessi wirkli no es paar Brötli verdienu – susch gitz de nix z’mittag!

Da tschechsch wie en Pol!

Jaja, ich weiss ich weiss. Ich bi wärli nimme grad d flissigschta im schribu, aber darfer hani ditzmal wideremal epis z verzellu. Letscht Wuchuänd bini nämli mit minder Kollegi en Schprung uf Warschau gangu. Fer schi is der Afang va iru Oschterferie deheimu bi ihru Eltru gsi und bi mier di Gläguheit zwei Kollegine z bsüechu, emal es Land kennuz’leru wani no nie bi gsi, es paar Wortjini ineru nöiiu Schprach z leru und ah ja, jetz hettis doch fasch vergässu, mier es Hochzitschleid ds chöifu! :) Wenni ehrli bi, isch das scho d Höiptide gsi vaner Reis, aber nidemal mini – das het nämli mini Kollegi vorgschlagu. Und will ich ja eh zwei Kollegine da ha, wanich suschter halt nie gseh, hani di Gläguheit eifach gipackt und bi gangu!

Am Fritag siwer embri gflogu. Ich cha chenu bi ira deheimu wohnu und ha so grad öi no iru ganz Famili kennuglert. Am Samschtag siwer de ga chleidru. Wier si der ganz Vormittag va Ponzius zu Pilatus gsecklut, ohni das wer es Chleid fer mich gfunnu hengi. Hingägu heiwer (wier isch in dem Tag immer d’einta va scho va hiewäg isch mit cho und en andri, wa ds Polu wohnt) langsam aber sicher en zimli genaui Vorschtellig va dem vercho, wani eiguntli wirkli ha wellu. Darum siwer de am Namittag zu deru Designeri gangu, wanich scho zum Vorüs im Internet gfunnu ha und hei ira erklert, was ich wellti. Schi het de gfunnu, dass das keis Problem sige und schi mier das gäru mächä! Mit andru Wort: Schi macht mier mini “Schträtsch” genau eso, wienich nu will hä. Judihui!

iner BadwannaEmabu siwer de wider zrug uf Komorov, wa wer gwohnt hei und hie isch de di köschtlich Situazio entschtannu, waner da ufum Bildji dernäbu gseht – mich butzt no jetz va lachu, wenni dra deichu! Bim Badu vam Techterli va irum Brüeder, isch mini Kollegi doch wärli va irum Brüeder gipuffti cho! Ich bi dermomänt iner Chuchi gsi und ha natirli sofort, mim Fotoapparat iner Hand, miessu ga lüegu, warum das da eso es Gigäg gigä het! :D Dasch appa es Bildji gsi – schi in voller Montur iner Badwanna! Weiss nimme, wer genau am meischtu glachut het… aber ich schetzu mal, ds chli Mejtji.

SchüeAm Natag, siwer de ga witerschoppu. Schi hent mer unnerandrum eis vanu greschtu (wenn nid ds greschtusch) Ichöifszentrum va Polu gizeigt, ds Maximus. Da heiwer zmittag gässu, aber suschter eiguntli nix gchöift… vor allum nid, nachdem mini Kollegin en Schüeverchöifer namu Paar Schüe ineru bschtimmtu Gressi gfregut het, der ira es Paar ineru Gressi chliner gigä het, mim Kommentar, di le schi de schono üsa! Da hei wer wider sche glachut! Imu andru Gschäft, hanich de aber zwei Paar Schüe gchöift! Ds eint Paar isch sehr wahrschinli fer d Hochzit! Ich ha eiguntli nid eso helli Schüe wellu, aber dischi hent mehr grad eso gfallu, dassi schi fascht ha miessu chöifu… vor allum bi denu Priisa! ;) Aber lüeg grad uf rächts, fer es Bildji van denu Schüe und säg sälber, ob di nid hibschi sigi!

iisch driSchpeter am glichu Tag siwer de nomal zrug inz Zentrum z Warschau, wan wer de no en andri Kollegi gitroffu hei. Das fer das Träffu no glängt het, het mier persönlich mega Freid gmacht! Ich ha schi scho sit dri Jahr nimme gseh und fascht vergässu, wie güet das wier sus zämu hei! Das passiert nisch jetz sicher nimme! Schi isch so en flotti und het va barum hängertu va vergässu üs ischum Zug üsz’schtigu! (Wier si äbu afa inu Zug ga hocku, will wer am Schluss es bitzji z früe si am Bahnhof gsi.) Fer ds Wuchuänd nomal zämu z fassu, chani währli sägu, dassis nid biröit ha, uf Warschau ds ga! D Schtadt isch zwar nid grad d hibschta und fer en Schtädterejs ener nid z empfählu, aber ich ha superliebi Lit (wider-)gitroffu und mer ändli es Chleid organisiert. Ha da also zig Fleige mit einum Tätsch gipreicht! :)

Und bivor no grad es Wort wägs dum Titl: Denu Witz verschtengi appa nummu ei Mänsch, wa dischu Blog appa nid läsut, aber ich ha mer sus grad gli nid mägu verbissu. Isch en uralte Gäg… ds alt fer ds erkleru.

wisitors and winter

Mama und PapaSodeli, isch scho widär es momäntji gangu, bissi derzüe bi chu epis hie z schribu. Letscht Wucha hani nid der Zit khä, will mini Eltru und mini Schweschter mich hie sind chu bsüechu. Schi sind mit dum Autozug cho und darum heiwer öi es bitzji eswas vam Land chennu ga alüegu und nid nummu grad z Schtadtzentrum. Am Mittwoch, dum Tag mit dum wächschtu Wätter siwer uf Skagen gangu. Da bini scho zig Mal gsi – öi mit der Mama und der Marie-Thérèse wennsch mi vor dri Jahr zersch mal sind chu bsüechu – aber es isch halt scho es ganz schpeziells Ortji fer Lit vane Bärga. D’Mama und der Papa hent de öi demuna es gschpässigs Gfühl im Büch kha, wennsch da am üssruschtu Schpitz gschtannu sind. Ds Bildji hiä linggs isch sozsägu en Biwis das ne trotzdem zimli güet gangu isch. :)

SchneeDs Foto hie ufer rächtu Sita isch nid appa va letsch Jahr oder va Grönland. Das isch was ich hittu morgu üs minum Feischter gseh ha – wirkli währli wahr! Ich ha gmeint, mine Meischter welle mich versecklu, waner mehr emorgu bim Wecku gseit het, dass schniie… aber nei. Der hat das nit nummu gmeint, äs isch öi wirkli so gsi! Inner Zwischuzit het’s aber wider üfkhert schniiu, d Sunna isch üsacho und es zämu mit dum Wind wa hittu wie nid gschid blasut het’s scho fasch alle Schnee wider grümmt, aber ey: ÄS HET GESCHNIIT!

I’m a legal alien…

ovo_matilde I dont take Matilde I take Ovo my dear
I like my Rivella once a day
And you can hear it in my accent when I talk
I’m a Swiss girl in Denmark


See me walking down Strøget
A knapsack here at my side
I take it everywhere I walk
WallisI’m a Swiss girl in Denmark


I’m an alien I’m a legal alien
I’m a Swiss girl in Denmark


Fasch zwei Monät nachdem di liebu Lit vam Dänischu Schtaat schich entschidu hent mir füf Jahr Asyl z gä, hanich hittu mini opholdskort (das isch so ungfähr wie bi iisch der B-Üswis) vercho – z’Judihui und Fallera! Wirkli lieb va dene. ;) Nummu das hie di gälb Charta vaner Chrankukass ungfähr zäh mal wichtiger isch: Schis Chrankuversichrigsnummer brücht mu nämli hie fer ALLES, wirkli ALZ! Vaner Bibliothek uber d Schparchschüel bis zum Schtaat sälber geit immer alles uber das Nummer – warum dasch mer da uberhöipt en zweiti Charta mit emu Üslandernummer (das heisst wirkli so!) adrejunt, isch mer es Rätsl. Aber janu. Jetz bini uf alli Fäll wider es offiziels Nummer uf allä Äbnä. Hurra… oder eso. *zähne knirscht*

« Previous Entries